Voir la source de 2002 01 10 sacramentorum sanctitatis tutela.latin

IOANNES PAULUS PP. II

LITTERAE APOSTOLICAE MOTU PROPRIO DATAE

'''''SACRAMENTORUM SANCTITATIS TUTELA'''''*

QUIBUS NORMAE DE GRAVIORIBUS DELICTIS CONGREGATIONI

PRO DOCTRINA FIDEI RESERVATIS PROMULGANTUR

Sacramentorum sanctitatis tutela, SS.mae Eucharistiae maxime et Paenitentiae, necnon fidelium in sortem Domini vocatorum praeservatio in observantia sexti Decalogi praecepti, postulant ut ad salutem animarum procurandam, « quae in Ecclesia suprema semper lex esse debet » ( [http://www.vatican.va/archive/cod-iuris-canonici/latin/documents/cic_liberVII_lt.html#pars3%20sec2 ''Codex Iuris Canonici'', can. 1752]), ipsa Ecclesia sua pastorali sollicitudine interveniat ad praecavenda violationis pericula.

Iam inde a Praedecessoribus nostris per opportunas Apostolicas Constitutiones sanctitati sacramentorum, praesertim Paenitentiae, provisum est, sicut Benedicti Papae XIV Constitutione ''Sacramentum Poenitentiae'', die 1 mensis iunii anno 1741, edita ; [[#_ftn1|[1]]] itemque canones Codicis Iuris Canonici anno 1917 promulgati, cum eorum fontibus, quibus sanctiones canonicae contra huius speciei delicta statutae fuerant, eundem scopum persequebantur. [[#_ftn2|[2]]]

Recentiore tempore ut ab his et conexis delictis praecaveatur, Suprema Sacra Congregatio Sancti Officii per Instructionem, incipientem a verbis ''Crimen sollicitationis'', ad omnes Patriarchas, Archiepiscopos, Episcopos aliosque locorum Ordinarios « etiam Ritus Orientalis » directam die 16 mensis martii anno 1962, modum procedendi hisce in causis statuit, quippe quae in ipsis iudicialis competentia, sive per viam administrativam, sive per viam processualem, exclusive tributa erat. In mente retinendum est quod huiusmodi Instructio vim legis habebat, cum Summus Pontifex, ad normam can. 247 § 1 Codicis Iuris Canonici anno 1917 promulgati, praeerat Sancti Officii Congregationi et de sua ipsius auctoritate Instructio procedebat, Cardinale pro tempore existente tantum Secretarii munere fungente.

Felicis recordationis Summus Pontifex Paulus Papa VI competentiam iudicialem et administrativam in procedendo « secundum suas emendatas et probatas normas » confirmavit per Constitutionem Apostolicam de Romana Curia ''[[content/paul-vi/la/apost_constitutions/documents/hf_p-vi_apc_19670815_regimini-ecclesiae-universae.html|Regimini Ecclesiae Universae]]'', die 15 mensis augusti anno 1967 editam. [[#_ftn3|[3]]]

Denique, Nostra qua pollemus auctoritate, in Constitutione Apostolica ''[[content/john-paul-ii/la/apost_constitutions/documents/hf_jp-ii_apc_19880628_pastor-bonus-index.html|Pastor bonus]]'', die 28 mensis iunii anno 1988 promulgata, expresse statuimus : « Delicta contra fidem necnon graviora delicta tum contra mores tum in sacramentorum celebratione commissa, quae ipsi delata fuerint, [Congregatio pro Doctrina Fidei] cognoscit atque, ubi opus fuerit, ad canonicas sanctiones declarandas aut irrogandas ad normam iuris, sive communis sive proprii, procedit », [[#_ftn4|[4]]] ulterius confirmando et determinando iudicialem eiusdem Congregationis pro Doctrina Fidei competentiam tamquam Tribunalis Apostolici.

Approbata a Nobis ''[http://www.vatican.va/roman_curia/congregations/cfaith/documents/rc_con_cfaith_doc_19970629_ratio-agendi_lt.html Agendi ratione in doctrinarum examine]'', [[#_ftn5|[5]]] necesse quidem erat pressius definire sive « graviora delicta tum contra mores tum in sacramentorum celebratione commissa », pro quibus competentia Congregationis pro Doctrina Fidei exclusiva manet, sive etiam normas processuales speciales « ad canonicas sanctiones declarandas aut irrogandas ».

Hisce Nostris Litteris Apostolicis Motu Proprio datis hoc opus perfecimus ideoque per eas promulgamus ''[[roman_curia/congregations/cfaith/documents/rc_con_cfaith_doc_20010518_epistula_graviora%20delicta_lt.html|Normas de gravioribus delictis Congregationi pro Doctrina Fidei reservatis]]'', in duas partes distinctas, quarum prima continet ''Normas substantiales'', secunda vero ''Normas processuales'', mandando omnibus quorum interest ut studiose et fideliter servent. Ipsae Normae vim legis exserunt eadem die qua promulgatae sunt.

Contrariis quibuscumque, etiam speciali mentione dignis, non obstantibus.

''Datum Romae, apud Sanctum Petrum, die XXX mensis Aprilis, in memoria Sancti Pii V Papae, anno MMI, Pontificatus Nostri vicesimo tertio.''

<span id="ioannes-paulus-pp.-ii"></span>
= IOANNES PAULUS PP. II =


-----

\*A.A.S., vol. XCIII (2001), n. 11, pp. 737-739

[[#_ftnref1|[^1]:]] Benedictus PP. XIV, Constitutio ''Sacramentum Poenitentiae'', 1 iunii 1741, in ''Codex Iuris Canonici'', Pii X Pontificis Maximi iussu digestus, Benedicti Papae XV auctoritate promulgatus, ''Documenta'', Documentum V, in ''AAS'' 9 (1917) Pars II, 505-508.

[[#_ftnref2|[^2]:]] Cfr. ''Codex Iuris Canonici anno 1917 promulgatus'', cann. 817, 2316, 2320, 2322, 2368 § 1, 2369 § 1.

[[#_ftnref3|[^3]:]][[content/paul-vi/la/apost_constitutions/documents/hf_p-vi_apc_19670815_regimini-ecclesiae-universae.html|Cfr. Paulus PP. VI, Constitutio Apostolica ''Regimini Ecclesiae universae'', De Romana Curia, 15 augusti 1967, n. 36, in ''AAS'' 59 (1967) 898.]]

[[#_ftnref4|[^4]:]][[content/john-paul-ii/la/apost_constitutions/documents/hf_jp-ii_apc_19880628_pastor-bonus-index.html|Ioannes Paulus PP. II, Constitutio Apostolica ''Pastor bonus'', De Romana Curia, 28 iunii 1988, art. 52, in ''AAS'' 80 (1988) 874.]]

[[#_ftnref5|[^5]:]][http://www.vatican.va/roman_curia/congregations/cfaith/documents/rc_con_cfaith_doc_19970629_ratio-agendi_lt.html Congregatio pro Doctrina Fidei, ''Agendi ratio in doctrinarum examine'', 29 iunii 1997, in ''AAS'' 89 (1997) 830-835.]

© Copyright 2001 - Libreria Editrice Vaticana

[[Catégorie:John Paul Ii]]
[[Catégorie:Motu_Proprio]]
[[Catégorie:21e siècle]]
[[Catégorie:Latin]]